Zaburi 129

¹ Wimbo wa kwenda juu. Wamenionea mno tangu ujana wangu; Israeli na aseme sasa:

² wamenionea mno tangu ujana wangu, lakini bado hawajanishinda.

³ Wakulima wamelima mgongo wangu, na kufanya mifereji yao mirefu.

⁴ Lakini Bwana ni mwenye haki; amenifungua toka kamba za waovu.

⁵ Wale wote waichukiao Sayuni na warudishwe nyuma kwa aibu.

⁶ Wawe kama majani juu ya paa, ambayo hunyauka kabla hayajakua;

⁷ kwa hayo mvunaji hawezi kujaza vitanga vyake, wala akusanyaye kujaza mikono yake.

⁸ Wale wapitao karibu na wasiseme, “Baraka ya Bwana iwe juu yako; tunakubariki katika jina la Bwana.”