Zaburi 124

¹ Wimbo wa kwenda juu. Wa Daudi. Kama Bwana asingalikuwa upande wetu; Israeli na aseme sasa:

² kama Bwana asingalikuwa upande wetu, wakati watu walipotushambulia,

³ wakati hasira yao ilipowaka dhidi yetu, wangalitumeza tungali hai,

⁴ mafuriko yangalitugharikisha, maji mengi yangalitufunika,

⁵ maji yaendayo kasi yangalituchukua.

⁶ Bwana asifiwe, yeye ambaye hakuruhusu turaruliwe kwa meno yao.

⁷ Tumeponyoka kama ndege kutoka mtego wa mwindaji; mtego umevunjika, nasi tukaokoka.

⁸ Msaada wetu ni katika jina la Bwana, Muumba wa mbingu na dunia.